അയ്യേ...ഇത് എന്തോന്ന് ?? ഇവന് വേറെ പണിയൊന്നും ഇല്ലേ ? കോളിഫ്ളവർ പായസം പോലും.....എന്നല്ലേ നിങ്ങൾ ഇപ്പോൾ വിചാരിച്ചത് ?? ഇതുതന്നെയാണ് ഞാനും ഈ ഐറ്റം ഒരു ടെലിവിഷൻ ചാനലിൽ കണ്ടപ്പോൾ വിചാരിച്ചത്. പക്ഷെ ഇതുവരെ കേൾക്കാത്തതും, രുചിച്ചു നോകാത്തതും ആയതുകൊണ്ട് ഒന്ന് പരീക്ഷിക്കാം എന്ന് വിചാരിച്ചു ഉണ്ടാക്കിയതാ....സംഗതി വളരെ രുചികരം! ക്വാളിഫ്ളവർ ആണെന്ന് ഒരാള്ക്കും മനസ്സിലായതുപൊലുമില്ല. വീട്ടിലെ എല്ലാര്ക്കും വളരെ ഇഷ്ടമായി. മിനിട്ടുകൾക്കുള്ളിൽ പാത്രം കാലി !! ഇനി നിങ്ങൾക്കും പരീക്ഷിച്ചു നോക്കാം ...
ആവശ്യമുള്ള ചേരുവകൾ:
കോളിഫ്ളവർ - 1/2 കിലോ
കണ്ടൻസ്ഡ് മില്ക്ക് (മില്ക്ക് മെയ്ഡ്) - 300 ml
പശുവിൻ പാല് - 1/2 ലിറ്റർ
അണ്ടിപരുപ്പ് , ഉണക്ക മുന്തിരി - ആവശ്യത്തിനു
കുങ്കുമ പൂവ് - ഒരു നുള്ള്
നെയ്യ് - 3 ടേബിൾ സ്പൂണ്
പാചക രീതി :
കോളിഫ്ളവർ കഴുകി വൃത്തിയാക്കി വളരെ ചെറുതായി ഗ്രയിറ്റ് ചെയ്ത് വെക്കുക.
4 ടേബിൾ സ്പൂണ് പാലിൽ കുങ്കുമ പൂവ് ചേർത്ത് മിക്സ് ചെയ്തു വെക്കുക.
ഒരു പാനിൽ 1 ടേബിൾ സ്പൂണ് നെയ്യ് ഒഴിച്ച് അണ്ടിപരുപ്പ് , ഉണക്ക മുന്തിരി എന്നിവ വറുത്ത് മാറ്റി വെക്കുക .
ചുവടു കട്ടിയുള്ള ഒരു പാത്രത്തിൽ 3 ടേബിൾ സ്പൂണ് നെയ്യ് ഒഴിച്ച് അതിലേക്കു ഗ്രയിറ്റ് ചെയ്ത് വെച്ചിരിക്കുന്ന ക്വാളിഫ്ളവർ ഇട്ടു നല്ലപോലെ വഴറ്റിയെടുക്കുക. ഇങ്ങിനെ ചെയ്യുമ്പോൾ ക്വാളിഫ്ളവറിന്റെ പച്ച ചുവ മാറികിട്ടും.
ഇനി ഇതിലേക്ക് പാല് ചേർത്ത് തിളപ്പിക്കുക. പാല് അടിയില് പിടിച്ചു കരിയാതിരിക്കാന് ഇടയ്ക്കിടയ്ക്ക് ഇളക്കി കൊടുക്കണം. പാല് തിളച്ചു വരുമ്പോൾ തീ കുറച്ചു വെച്ച് അതിലേക്കു കണ്ടൻസ്ഡ് മില്ക്ക് ചേർക്കുക. എല്ലാം നല്ലപോലെ ഇളക്കി യോചിപ്പിച്ചു പാല് കുറുകി വരുമ്പോൾ തീ അണക്കുക. ഇനി ഇതിലേക്ക് പാലിൽ കുതിർത്തി വെച്ചിരിക്കുന്ന കുങ്കുമ പൂവ് ചേർത്ത് ഇളക്കുക. തണുക്കുമ്പോള് പായസം അല്പം കൂടി കുറുകിയിരിക്കും. അത് കണക്കാക്കി വേണം അടുപ്പില് നിന്നും വാങ്ങാന്.
ഇനി വറുത്തു വച്ചിരിക്കുന്ന അണ്ടിപരുപ്പ് , ഉണക്ക മുന്തിരി എന്നിവ ചേർക്കുക.
കോളിഫ്ളവർ പായസം തയ്യാർ !!
No comments:
Post a Comment